2025 жылғы 6 тамызда ҚР ПІБ жанындағы Парламентаризм институтында аралас форматта (онлайн және офлайн) қылмыстық-атқару заңнамасын жетілдіру мәселелері бойынша сараптамалық кеңес өтті. Іс-шараның бастамашысы – ҚР Парламенті Мәжілісінің депутаты Абзал Темірғалиұлы Құспан.
Талқылауға ҚР Парламенті Мәжілісінің депутаты, Заңнама және сот-құқықтық реформа комитетінің мүшесі Абзал Құспан, Парламентаризм институтының директоры Наталья Пан, ҰҚК Тергеу департаменті басқармасының бастығы Игорь Осипов, Қылмыстық-атқару жүйесі комитетінің режим, қадағалау және күзет басқармасы басшысының орынбасары Ержан Жұмаділов, Парламентаризм институтының Норма шығармашылық жұмыс жөніндегі басқарманың атқарушы директоры Алмас Қанатов, Сот жүйесі және құқық қорғау органдары орталығының басшысы Асқар Үртембаев, орталықтың бас маманы Нұртай Иманғалиев, сондай-ақ Бас прокуратура, Сот әкімшілігі, Сыбайлас жемқорлыққа қарсы іс-қимыл агенттігі, Ұлттық қауіпсіздік комитеті, Әділет министрлігі және басқа да салалық мемлекеттік органдардың өкілдері қатысты.
Наталья Пан Мемлекет басшысы Қасым-Жомарт Тоқаевтың құқық қорғау органдарының кеңейтілген отырысында қылмыстық-атқару жүйесін терең реформалау қажеттілігіне назар аударғанын еске салды. «Жүйе тек сотталғандарды оқшаулауға емес, оларды қайта тәрбиелеуге және қоғамға бейімдеуге бағытталуы тиіс. Заң мен құқықтық тәртіпке құрметті қалыптастыратын тәсілдерді енгізу маңызды», – деп Мемлекет басшысының сөзін келтірді.
Кеңес аясында бірқатар өзекті мәселелер көтерілді. Депутат Абзал Құспанның айтуынша, қазіргі таңда жазаны орындау мекемелерінің 75%-ы заманауи талаптарға сай келмейді. Сонымен қатар, ол түзеу жұмыстары түріндегі жазаны алып тастау және сот үкімдерін орындау қызметін Әкімшілік рәсімдік-процестік кодекстің қолданыс аясынан шығару жөнінде ұсыныс білдірді.
Кеңес барысында УИС мекемелерінің артық толуы мәселесіне ерекше назар аударылды. Тоғыз өңірде мекемелердің толуы рұқсат етілген шектен асып, 104%-дан 265%-ға дейін жеткен. Алты облыста мекемелер шекті шегіне жақындап қалған. Ақмола облысында бұл бағыттағы арнайы мекеме мүлде жоқ.
Парламентаризм институты барлық қатысушыларға белсенді ұстанымы мен еліміздің қылмыстық-атқару жүйесін реформалау және жетілдіру бағытында мемлекеттік және қоғамдық құрылымдармен ынтымақтастыққа дайын екені үшін алғыс білдірді.
