Бүгін ҚР ПІБ жанындағы Парламентаризм институты Сенатта Қазақстан Республикасының қылмыстық заңнамасын жетілдіру мәселелеріне арналған дөңгелек үстел өткізді.
Іс-шараның мақсаты-Қазақстан Республикасы Қылмыстық кодексінің он жылға жуық қолданыс тәжірибесін талқылау, қылмыстық заңнамадағы бар проблемаларды анықтау және оны жетілдіру жолдарын қарастыру.
Парламентаризм институты директорының орынбасары Ләззат Сүлеймен өз сөзінде атап өткендей, Қылмыстық кодекс қабылданған кезден бастап өзгерістерге ұшырауда. Қоғамдық қатынастар мен әлеуметтік-экономикалық жағдайлардың өзгеруіне байланысты оған өзгерістер мен толықтырулар енгізіледі.
«Қазіргі уақытта Парламент Мәжілісі депутаттарының қарауында Қылмыстық, Қылмыстық-процестік және қылмыстық-атқару кодекстерін оңтайландыру туралы заң жобасы тұр. Үкімет, депутаттар мен сарапшылар белсенді талқылайтын түзетулердің жеткілікті кешенін дайындады», - деді Л.Сүлеймен.
Дөңгелек үстелге қатысушылар қылмыстық заңнаманы оңтайландыру Заңның ағымдағы ахуал талаптарына сәйкестігін және оның өзгерістеріне уақтылы ден қоюды қамтамасыз ету үшін криминология, сот практикасы және халықаралық стандарттар саласындағы зерттеулерді талдауға негізделуі тиіс екенін атап өтті. Бұл заңсыз айыптаулардың санын қысқартуға, сондай-ақ қылмыстық құқық бұзушылық жасаған адамдарды неғұрлым әділ және тиімді жазалауды қамтамасыз етуге мүмкіндік береді.
Сарапшылар қылмыстық және қылмыстық іс жүргізу заңнамасының тұрақтылығын қамтамасыз етуге бағытталған тетіктерді әзірлеудің маңыздылығын атап өтті.
Әрине, резонанстық қылмыстардан кейін жазаны қатаңдатуға қойылатын талаптарды ескеру маңызды. Дегенмен, заңдарды қатаңдатуды сарапшылар тиімсіз деп таниды, өйткені бұл өркениетті қоғамның стандарттарына сәйкес келмейтін заңнаманың репрессивтілігінің күшеюіне әкелуі мүмкін. Оның орнына қылмыстың алдын алуға және сотталғандарды оңалту бағдарламаларын жақсартуға назар аударған жөн.
Іс-шараға Парламент Сенатының депутаты Советбек Медебаев, Парламент Мәжілісінің депутаты Абзал Құспан, Конституциялық соттың мүшесі Еран Сәрсембаев, сондай-ақ ғалымдар, адвокаттар, мемлекеттік органдардың өкілдері мен сарапшылар қатысты.
