26 маусымда Ақтөбе қаласында аудандық мәслихаттардың депутаттары мен аппарат қызметкерлеріне арналған екі күндік оқыту тренингі басталды. Іс-шара Сенат пен жергілікті өкілді органдар арасындағы ынтымақтастық аясында өткізіліп, аудан деңгейіндегі өкілеттіктерді арттыруды мақсат етеді.
Тренингті ұйымдастырғандар – Парламентаризм институты, Парламентаризмді дамыту қоры және Астанадағы ЕҚЫҰ Бағдарламалар офисі.
Алға, Байғанин, Қарғалы, Мартөк, Шалқар, Қобда, Хромтау, Ырғыз, Ойыл, Әйтеке би аудандары мен облыстың өзге де өңірлерінен келген 44 мәслихат өкілі қатысты.
Спикерлер қатарында Парламентаризм институты директорының орынбасары Ләззат Сүлеймен, Парламентаризмді дамыту қорының президенті Зауреш Батталова, БҚО мәслихатының төрағасы Мұрат Мұқаев, ЕҚЫҰ Бағдарламалар офисінің басшысы міндетін атқарушы Юрий Фенопетов және Парламентаризм институтының сарапшысы Меруерт Қабылбаева болды.
Тренингтің алғашқы күні қатысушылар халықпен жұмыс жүргізу, қоғамдық кеңестермен өзара іс-қимыл, депутаттық этика және заңнамалық сауаттылық мәселелерін талқылады.
Ләззат Сүлейменнің айтуынша, бұл оқу циклі аудандық деңгейдегі депутаттардың әлеуетін арттыруға бағытталған. Оның пікірінше, мұндай тренингтер жергілікті өкілді билік өкілдерін жүйелі даярлаудың тұрақты форматына айналады.
2024 жылы осыған ұқсас бағдарламалар еліміздің барлық өңірінде өткізілген болатын. Оған жалпы 2000-ға жуық адам қатысқан. Жаңа оқу кезеңі осы тәжірибені жалғастырып, ауылдық және аудандық округтер өкілдеріне ерекше назар аударумен ерекшеленіп отыр.
